ភ្នំពេញ៖ ប្រធានរដ្ឋសភាកម្ពុជា សម្ដេចពញាចក្រី ហេង សំរិន បានសំដែងនូវការពេញចិត្តចំពោះចំណងមិត្តភាពរវាងកម្ពុជា-វៀតណាម ដែលជាអ្នកជិតខាងល្អ និងមានកិច្ចសហប្រតិបត្តិការល្អជាមួយគ្នាយូរអង្វែងមកហើយ។ ដោយសម្ដេចសង្ឃឹមថាចំណងទំនាក់ទំនងមិត្តភាពបន្ត និងពង្រីកបបន្ថែមទៀតទៅថ្ងៃអនាគត។

ក្នុងលិខិតជូនពរក្នុងឱកាសពិធីចូលឆ្នាំថ្មីប្រពៃណីចិន-វៀតណាម ដល់ប្រធានសភាវៀតណាមលោក Vuong Dinh Hue សម្ដេចពញាចក្រី ហេង សំរិន បានចូលរួមអបអរជាមួយវៀតណាមក្នុងឱកាសនេះ និងជូនពរលោក Vuong Dinh Hue ឱ្យទទួលបានសេចក្ដីសប្បាយរីករាយចម្រើងរុងរឿងក្នុងឆ្នាំ២០២២ និងជូនពរដល់សាធារណរដ្ឋសង្គមនិយមវៀតណាមបន្តទទួលបាននូវវឌ្ឍនភាពនិងវិបុលភាពតរៀងទៅ។

សម្ដេចពញាចក្រីបានចាត់ទុកប្រទេសវៀតណាម ជាប្រទេសភូមិផងរបងជាមួយដ៏ល្អ និងបានសម្ដែងនូវការពេញចិត្តចំពោះទំនាក់ទំនងកាលពីកន្លងមកនិងសង្ឃឹមថាទំនាក់ទំនងនេះនឹងបន្តរីកចម្រើននិងយូរអង្វែងតទៅមុខបន្តទៀត។

ក្នុងលិខិតនោះសម្ដេចពញាចក្រីបានលើកឡើងថា៖ «ខ្ញុំសូមសម្ដែងនូវការពេញចិត្តយ៉ាងក្រៃលែងចំពោះទំនាក់ទំនងមិត្តភាពយូរអង្វែង និងភាពជាអ្នកជិតខាងល្អ និងកិច្ចសហប្រតិបត្តិការគ្រប់ជ្រុងជ្រោយរវាងស្ថាប័ននីតិប្បញ្ញត្តិ ក៏ដូចជាប្រទេសយើងទាំងពី ទាំងនៅក្នុងកម្រិតទ្វេភាគី និងពហុភាគី ហើយខ្ញុំមានជំនឿយ៉ាងមុតមាំថា ទំនាក់ទំនងជាប្រពៃណីយូរអង្វែងខាងលើនេះ នឹងត្រូវបានពង្រឹង និងពង្រីកបន្ថែមទៀតទៅថ្ងៃអនាគត ដើម្បីបម្រើប្រយោជន៍ដល់ប្រជាជនយើងទាំងពីរជាបងប្អូន»។

កម្ពុជា-វៀតណាមបានបង្កើតទំនាក់ទំនងការទូតជាមួយគ្នាចំនួន៥៥ឆ្នាំហើយ (១៩៦៧-២០២២) ក្នុងទំនាក់ទំនងនេះមានទាំងល្អ និងអាក្រក់ជាមួយគ្នា ទោះជាយ៉ាងណាក្រោយការរំដោះប្រទេសចេញពីរបបខ្មែរក្រហមចំណងទំនាក់ទំនងប្រទេសទាំងពីរបានក្លាយជាចំណងទំនាក់ទំនងសហប្រតិបត្តិការនិងជួយគ្នាដែលរដ្ឋាភិបាលប្រទេសទាំងពីរបានចាត់ទុកគ្នាថាជាអ្នកជិតខាងល្អថែមទៀត។

ពិធីបុណ្យចូលឆ្នាំប្រពៃណីចិន-វៀតណាមចាប់ផ្ដើមនៅថ្ងៃទី៣១ ខែមករា ឆ្នាំ២០២២ រហូតដល់ថ្ងៃទី២ ខែកុម្ភៈ ឆ្នាំ២០២២៕